بعد مجزرة إخوتنا
الحمير اللي قامت بيها الحكومة ,بتهمة أن الحمير يحملون الدواء إلى أطفال الثورة,
ومن هداك اليوم الحمير اللي نجت من المذبحة قررت تهاجر إلى البلدان المجاورة,وما
عاد نشوف حمار أو نسمع نهيق في البلاد,ما تتصورو قديش حزنت على رحيل الحمير,لكن
اللي صار في الليلة الفارطة بعد قطع الكهربا ,انو هواء بارد مزعج مشمئز بلش يهب
علينا,كالعادة دخلت بالفراش وغطيت جسمي بالبطانية,وخليت راسي مكشوف زي فار مطالع
راسو من الجحر,احاور الشمعة حول اسباب الولادة العسيرة للثورة السورية,حسيت بوجع
في ذكرياتي وكانو قارات العالم تبرم في عقلي ,وما بعرف ليش قارة اسيا استقرت في
كياني ,يمكن لاول مرة احس اني انتمي الى هذا الاسم العظيم,بقيت سهران مع الشمعة
,والكهربا بنت الكلب ما تجي ,تمنيت امسك برقبة هلـ الحيوان اللي يأمر بقطعها ,حتى احط
الفيش في … !! والف جسمو كلو بالاسلاك وبعدين امرر فيها تيار كهربا 300 فولت
واعمل منو لمبة , دابت الشمعة اعتذرت مني وقالت انا انتهيت دبر حالك ,ضليت قاعد
بالعتمة متخيل الشمعة شعلانة … الريح
باردة يطير اكياس النايلون وعلب الكرتون وتضرب الشبابيك وتهز اطباق الستلايت بشكل مقرف متل الاشباح,يعمل انقباض في
نفسي, كانت عندي رغبة اتخيل حبيبتي ,لكن قلبي ما طاوعني احلم بحبيبتي في
العتمة,مشان هيك فكرت في شي بكرهو متل الحكومة اللي اتمنى تروح على جهنم ما فيها
كهربا ولا مي ولا نت ولا موبايل ,لا شمع لا مي لا اكل لا دواء ,واكون رئيس قسم
التعذيب فيها,حتى اعرف كيف اشوي اعضاء الحكومة شوي متل ما هي تشوينا من 50
عام,وانا هيك غارق في احلام اليقظة ,سمعت طرق خفيف علـ الباب … سترك يا رب مين
يدق الباب بعد نص الليل ان شا الله ما يكونو استخبارات ,بالزور قمت ورحت ورا الباب
وقبل ما افتحو سألت بالعربية الفصحى من الطارق:سمعت صوت خفيف يقول … عانا عانا
عجل افتح الباب, عرفت الصوت هو صديقي الحمار ,بسرعة فتحت الباب ,….مفاجئة مش
متوقعة ما تحصل حتى في الافلام الهندية ,حمار معارض للحكومة يلتقي مع صديقو داخل
البلد,صحت بالحضن يا كبدي ,نزلنا في بعضنا بوس ودموع الفرح تنزل من عيوننا,يعني
مستحيل تشوف حمار ساغ سليم في سوريا لانو حسب الدستور العصري الجديد اللي عملتو
الحكومة كل حمير العالم خونة مندسين ,واي مواطن يتستر على حمار او يقدمو له مساعدة
يعتبر خائن وتكون عقوبتو الاعدام رميا بالرصاص ,سالت الحمار يا اخي شو رجعك علـ
البلد ما بتعرف انك مطلوب من كل فروع الاستخبارات والله اذا شافوك راح يرتكبو
مذبحة تانية ,قال خلينا ندخل بعدين احكي لك,خفت دورية بوليس تمسك حماري دخلنا
البيت,… حمار اسمر شب باول عمرو والله حرام شكلو منهك تعبان جسمو كلو وسخ مليان
جروح… اه يا كبدي باين عليه الحزن والكآبة,اهلا اهلا بالعزيز من زمان ما شفتك
كيفك كيف الاهل والاصحاب ,عرفتو جوعان عملتلو شوية اكل وغسلتو ومشطت شعرو ,قلتلو يلا احكي لي شو صار معكم,قال:انا
ما طلعت من البلد (هنا خلقت وهنا اموت) أي والله بطل .. بطل .. من يوم يومك بطل
,طيب ما تخاف يعتقلوك,قال انا سمعت انو كوفي انان راجع للبلد تاني وانا بدي اشوفو
واحكيلو تفاصيل المجزرة من طق طق للسلام عليكم حتى العالم يعرفو الحقيقة,قتلو
حبيبتي وامي وعمي واخواتي الصغار,وتركو الجثث بالبرية ,انا الوحيد قدرت اهرب
منهم,ومن يومها صارت عندي عقدة نفسية ورغبة بالانتقام,بدي ارفس بدي انهق بدي اعض
بس ما بقدر لازم تساعدني,خليني من جديد اقدر اتحرك,قلت:احيي نضالك,واشد على حوافرك
واعلن انضمامي اليكم معشر الحمير,لكن في الظرف الحالي النهيق خطر عليك ,قال ما راح
انهق غير مرة واحدة في وجه كوفي انان اقدمو له شهادتي واقول سلم على اخي اوباما
وابن عمي بان كي مون,طيب شو هي المعلومات اللي عندك معقول انك دخلت ايميل رئيس الحكومة.. اه يا ملعون عامل
حالك هاكرز وعم تعمل قرصنة على بريد دولة اللصوص,قال: لا يا اخي في حمار صديقي بالدولة هو اللي جاب
المعلومات,… كنا مجموعة حمير طالعين نزهة بالبرية نعمل حفلة نهيق في الهواء
الطلق بمناسبة مهرجان النهيق العالمي,نأكل الحشيش ونشرب شراب الطاقة,ونعمل علاقات غرامية,تعرف نحنا الحمير
ثقافتنا متحررة وما في قيود بين البنات والشباب ,وفجأة اجت دورية استخبارات مدججة
بالسلاح,ومعها خبير اطلاعات ايراني ,وشبيحة من حزب اعداء الله ,خفنا منهم وبدون
شعور بلشنا ننهق باعذب النهقات والشنهقات
نعمل Rai و rap وHip-hop
ونغني اغاني رابح درياسة ومايكل جاكسون,…. رئيس الدورية نظر علينا عرفت
من نظراته انو ناوي على الشر,سال الخبير الايراني,كيف تقيم الوضع هدول الحمير
مولاة ام معارضة,الخبير الايراني,قال:((اعوزو باللهي من الشيتاني الرجيمي هاولائي
عبزتو الشيتاني لعنتوا اللهي عليهم,اعتقزو ان هازهي الهمير زدو النظام واعتقزو ايزن انها تردد نهقات معارزة للحكومة ,يجبو
التخلص منها بسرعة ,اللهووو اكبررر ))الضابط سمع كلام الخبير الايراني,وقبل ما
يتاكد منا وبدون ما يسال اذا كنا طالعين في مظاهرة او حفلة,وبدون ما يخطر على بالو انو المظاهرات تقوم
في المدن مش في البراري,وانو الحيوانات بعمرها ما عملت مظاهرة,اخي نحنا مافيش
عندنا ظلم بقى ليش نعمل مظاهرات ,قلت له وجه السؤال الى خامنئي مو الي, هو اللي طالع
فتوى انو اذا أي شيىء تحرك في سوريا او فتح فمه فان قتله حلال,…. بدي اقول انو الخبير الايراني ما كانش بيعرف عربي,وما عرف
يترجم نهيقنا الى اللغة الفارسية بشكل صحيح وفهم صوتنا على انو شعارات معادية
للنظام,ومشان هيك امر بقتلنا,طيب شو ذنب 17 حمار ينقتلو لانو الخبير طلع جحش ابن
جحش,ما راح اسكت بدي اطالب كوفي انان يحيل ملفنا الى محكمة لاهاي,… والله معك حق
يا صديقي,يمكن العالم بفضل نهيقك ينتبهو النا كمان ويحولو ملفات شهدائنا كمان الى العدالة الدولية,بس اذا العالم نام و طنش
متل ما هو مطنش حاليا, شو راح تعمل,انا مضطر ادافع عن نفسي بدي ارفس الكرة الارضية
كلها,… سمعت الحمار ودموعي تنزل مطر وقلبي يفور غضب,شو هلـ السفالة شو هلـ
النذالة الامور وصلت حد انو امام الامة يحط راسو براس شوية حمير حلوين مسالمين
عاشقين ,حتى يطلع فتوى بابادة حمير بلادي,وكانو ما شبع من دم اطفالنا وشبابنا
وبناتنا حتى يشرب دم حميرنا,لا هادا مو مقبول وما بقى نتمحل نحنا كمان بدنا نرفس
اللي يقتلونا ونعض كم رئيس بالمنطقة والعالم يساعدو حكومة المجرمين على قتلنا .
زاكروس عثمان
اكتشاف المزيد من Kurd Online
اشترك للحصول على أحدث التدوينات المرسلة إلى بريدك الإلكتروني.
الآراء الواردة في المقالات لا تعكس بالضرورة رأي صحيفة كورد أونلاين
