يا شباب كلما يطلعولنا بمبادرة لحلحلة الازمة السورية احط ايدي عا قلبي واقول الله يستر ,لانو ورا كل مبادرة تجي رخصة جديدة من (امريكا اولا ,اسرائيل ثانيا ,الاتحاد الاوروبي ثالثا,روسيا رابعا,الصين خامسا ,ايران وعربها سادسا,تركيا وعربانها سابعا ,الامم المتحدة ثامنا,و و و عاشرا ) لنظام دولة الشبيحة حتى يقتل ابناء الشعب السوري عا كيفو ,قبل المبادرة العربية القتل كان بس بالعشرات بعدها صار بالمئات ,قبل المبادرة الدولية القتل كان في منزلة المئات وبعدها دخل منزلة الالوف,واليوم مؤتمر جنيف ناوي ينقل القتل الى خانة احاد الالوف وعشرات الالوف ومئات الالوف, والشباب متل كل مرة وزعو فيما بينهم الادوار بشكل مزبوط , طلبو من كوفي انان يمطمط بالحكي ويقول الازمة السورية بدها سنة يعني 100 قتيل ضرب 360 يوم , والوزيرة الحسناء الشقراء هيلاري – اللي يوم من الايام كنت معجب بجمالها وبعدين زعلت منها لانها فضلت مستر اوباما عليا,عملت حالها عنتر بن شداد وتحمست وقالت ايام السيد اساد في الحكم اصبحت محدودة ,جيت اصدقها واقول يا شباب وزعو كوكاكولا عا حساب شريف شحادة,قبل ما ينط عا ايران,وبعدها اجا الشبيح لافروف وزير خارجية روسيا ,وزحلق الوزيرة هيلاري وشطب على كل كلامها وقال الحقيقة, وقتها قلت الله يستر من جنيف وبلاويها,لانو الرخصة الجديدة تسمح باجماع دولي بقتل 1000 مواطن سوري يوميا الى اجل غير مسمى .
والله مالنا حق نعاتب حدا , العيب منا وفينا ,وفي كافة اطراف المعارضة السورية العتيقة, يللي لسا تتامل تغير في موقف امريكا وكانهم ما يعرفو ان اللعبة كلها مطبوخة في البيت الابيض , وما حدا يقدر يعمل شي الا بموافقة مسترررر اوباما , يعني المعارضة الكسيحة والبليدة تراهن على الحصان الامريكي الخاسر , وتترك حصان الحراك السوري السلمي الثائر ,اللي يقدر يقلب الطاولة على راس امريكا وروسيا وغيرها وغيراتها,امتى نشوف قيادة ذكية وجريئة وشجاعة, حتى تحط استراتيجية جديدة للثورة تنطلق من قناعة راسخة وهي انو 80 % من دول العالم عدوة للثورة السورية,وبناءا عليه يجب الاعتماد على القدرات الذاتية للشعب السوري حتى ثورتو تحقق اهدافها , بدل ما يستجدو العطف والشفقة من عالم كلب ابن كلب ..!!
زاكروس عثمان
اكتشاف المزيد من Kurd Online
اشترك للحصول على أحدث التدوينات المرسلة إلى بريدك الإلكتروني.
الآراء الواردة في المقالات لا تعكس بالضرورة رأي صحيفة كورد أونلاين
