شيرزاد زين العابدين
ژ بێدەنگییا شەڤێن تاری
سپێدا مزگینیێ دبینم
ژ گڕنژینا زاڕۆکەکێ
ئەنفال کری
بێ باب و دای
د لاندکێدا مای
تۆڤێ بەرخوەدانێ دچینم
ژ دار بەڕویا
هەر ساڵ سووتی
ژ وان تەرحێن
شەنگ و شەپال
سەد گۆپالا دێ چەمینم
دێ دەم دەستێن خورت و لاوا
دا گورگێن هار
ژ ئاخا وەلاتی ب رەڤینم
شوینا هەر مێوەکا سووتی
هەر كەڤوتا
دارکوکا سمتی و ڤەڕۆتی
هەر کەڤۆکا
ئەژدەهارا
خوین لێ مێتی
داستانا سەرخوەبوونێ
دێ کەم هۆزان و ڤەهینم
گەر ئێک بگرین
ل هەر چار پارچا
رۆژێ دێ ژ ئاسمانا ئینین
گەر ببین ئێک
چ مە بڤێتن
دێ وێ بینین
لێ چما ئەم هەر هو دمینین؟
هەتا کەنگی
دێ هەر روینین ؟.
٢٠٠٤
اكتشاف المزيد من Kurd Online
اشترك للحصول على أحدث التدوينات المرسلة إلى بريدك الإلكتروني.
